“Çështja për financimin rus në PD është e ndikuar politikisht”, ish-ministri i drejtësisë: Qeveria pagoi biletat për dëshmitarë

Ish-ministri i Drejtësisë Eduard Halimi ka deklaruar se hetimi për financimet ruse në PD, është fals dhe i fabrikuar politikisht.

Ai ka shtuar se ka qenë qeveria ajo që ka dërguar në Departamentin e Drejtësisë dëshmitarë mbi këtë çështje, ndërkohë që ende nuk njihet identiteti i tyre apo ajo që kanë deklaruar.

Halimi deklaroi gjithashtu se kërkesa e deputetëve të opozitës për krijimin e një komisioni hetimor në lidhje me hetimin për përfshirjen e kryeministrit Rama në skandalin “McGonigal” është një e drejtë ligjore dhe nuk ka hapësira për kundërshtimin e saj.

Ish -ministri u shpreh se opozita nuk bën dot hetim penal sepse e bën prokuroria, dhe se e vetmja gjë që mund të bëjë është të shohë përputhshmërinë e veprimtarisë së qeverisë me ligjin dhe Kushtetutën, me anë të një komisioni të tillë.